AhabanzaPolitikiRwandaUncategorized

Polisi y’u Rwanda n’iya Uganda baganiriye ku ngamba zo gufatanya kurwanya ibyaha byambukiranya imipaka

Polisi y’u Rwanda n’iya Uganda, ejo tariki 2 Nyakanga uyu mwaka baganiriye ku ngamba z’uburyo barushaho gushimangira ubufatanye mu kurwanya no gukumira ibyaha byambukiranya imipaka; byaba ibikorerwa muri ibyo bihugu ndetse no mu karere muri rusange.

Ibi byaganiriwe mu nama yahuje impande zombi yabereye mu Ishuri Rikuru rya Polisi y’u Rwanda riri mu karere ka Musanze; ikaba yari iyobowe n’Umuyobozi Mukuru wa Polisi y’u Rwanda, Inspector General of Police (IGP) Emmanuel K. Gasana na Assistant Inspector General of Police (AIGP) Fred Yiga wari uhagarariye Polisi ya Uganda.

Atangiza iyo nama, IGP Gasana yabwiye abayitabiriye ko imikoranire myiza iranga Polisi z’ibihugu byombi ituma barwanya ibyaha mu karere biherereyemo ; ndetse yongeraho ko iyi nama ari undi mwanya w’ingenzi wo kongera kuganira ku buryo bwo kurushaho guteza imbere uwo mubano hagamijwe guterana ingabo mu bitugu mu kubungabunga no gusigasira umutekano mu bihugu by’aka karere no guteza imbere imiyoborere n’iterambere ry’abagatuye.

Yagize ati, ″Umusaruro w’ubufatanye bwacu uragaragara. Ugushyira hamwe bituma iyo hagize umunyabyaha uhungira muri kimwe mu bihugu byacu afatwa akoherezwa aho yakoreye icyaha kugira ngo agezwe imbere y’Inkiko.″

IGP Gasana yagize kandi ati,″Hari ingero zifatika zigaragaza inyungu y’iyo mikoranire myiza. Twatanga urugero rw’imodoka zibwa mu bihugu by’aka karere ndetse no hanze yako zifatirwa mu Rwanda zigashyikirizwa ba nyirazo. Urundi rugero ni urw’abashakishwa bakekwaho kugira uruhare muri Jenoside yakorewe Abatutsi mu 1994 bafatirwa mu bihugu by’aka karere  boherezwa mu Rwanda.″

Abitabiriye iyo nama basuzumye aho impande zombi zigeze zishyira mu bikorwa imyanzuro y’Inama zabanje, ndetse baganira ku iyubahirizwa ry’iyafatiwe mu nama z’Abayobozi Bakuru ba Polisi zo mu bihugu byo mu karere ka Afurika y’i Burasirazuba (EAPCCO); U Rwanda rukaba ari rwo ubu ruyoboye Ubunyamabanga Bukuru bw’iri  Huriro. Baganiriye kandi ku buryo bwo guteza imbere Umuryango wa Polisi Nyafurika (AFRIPOL) umaze igihe gito ushyizweho; ishyirwaho ryawo rikaba ryaraturutse ku gitekerezo cy’u Rwanda.

Biteganyijwe ko Igihugu cya Uganda ari cyo kizayobora EAPCCO kuva mu Kwezi gutaha.

Mu ijambo rye, AIGP Yiga yavuze ko iyi nama ari umwanya w’ingenzi wo kuganira no gushakira ibisubizo birambye ibibazo bifite aho bihurira n’ubuzima bwa buri munsi bw’abaturage no gushakira umutekano urambye aka karere.

Yagize ati, ″Ni iby’agaciro gakomeye ndetse ni n’inshingano za buri wese gutanga umusanzu mu kubungabunga no gusigasira umutekano nk’uko Umukuru w’Igihugu cy’u Rwanda yabivuze. Umutekano w’ibihugu by’aka karere ugomba kuba ntayegayezwa. Hagomba rero kubaho ubufatanye buhoraho kandi buhamye kugira ngo ibyo bigerweho.″

Yagarutse ku kamaro ka AFRIPOL ifite icyicaro gikuru  i Algiers  muri Algeria avuga ko ari igisubizo kuri Afurika cyo kwishakamo ibisubizo bijyanye n’Umutekano kuri uyu mugabane w’isi.

Umuyobozi Mukuru wa Polisi ya Uganda, Gen. Kale Kayihura ni Umunyamabanga Mukuru  wungirije wa mbere wa AFRIPOL .

AIGP Yiga yibukije ko nta we ushobora kurwanya ibyaha byambukiranya imipaka adafatanyije n’abandi; bityo asaba Polisi zo mu bihugu by’aka karere ndetse na Afurika muri rusange gusenyera umugozi umwe mu kurwanya ibyaha birimo ibikorwa hifashishijwe Ikoranabuhanga, ibikorwa by’iterabwoba no gufatanya kurinda abagore, abakobwa n’abana ihohoterwa.

4,631 total views, 0 views today

Related Articles

Leave a Reply

Your email address will not be published. Required fields are marked *

Close