AhabanzaUrukundo

Ishavu ry’umusore waciwe ruhinganyuma agatwarwa umukobwa yakoye biteguraga kurushinga

Urukundo ruraryoha ndetse rukarushaho kunurira iyo rurambye ariko ruranababaza rukaba nk’igisonga kije ku mutima iyo abari mu rugendo barucikishirijemo hagati rutaragera ku byishimo by’indunduro.

Umusore n’inkumi bafitanye umushinga wo kubana, iyo hajemo agatotsi hari uzongwa akananirwa kubyakira nk’uko byabaye ku musore w’Umunyarwanda wanzwe n’umukobwa yari yamaze gutangaho inkwano y’ibihumbi 575 Frw.

Aba bombi bari bahuje umugambi waje kurogowa n’uko iwabo w’umukobwa bakiriye inkwano z’undi musore ndetse banashyiraho itariki y’ubukwe buteganyijwe muri Mutarama 2018.

Uyu musore uba muri Canada, Gasore [izina ryahinduwe] avuga ko yakundanye n’umukobwa uvuka ahitwa i Mushaka mu Karere ka Rusizi ndetse baza no kwemeranya kubana, ku buryo yaje gutanga inkwano y’ ibihumbi 575 Frw, ariko ababyeyi be baza kumuhinduka bakira indi, ari nawe bafata nk’umukwe wabo ugiye kurongora umukobwa bibarutse mu minsi ya vuba.

Gasore yatangarije IGIHE ko yababajwe cyane no kubona ubutumire bw’ubukwe bw’uyu mukobwa bari bagiye kurushingana n’undi mugabo kuko yari yaramaze kumukwa kandi n’ababyeyi be babizi.

Avuga ko se w’uyu mukobwa yariye inkwano ze nyuma yo kumenya ko aba muri Leta Zunze Ubumwe za Amerika.

Yagize ati “Ndi Umunyarwanda mba muri Amerika mu Mujyi wa Chicago, mfite ikibazo cy’umuntu nahaye amafaranga yanjye y’inkwano hanyuma amaze kumenya ko mba hanze, umukobwa we arongera aramukosha afata indi nkwano.”

Yakomeje avuga ko se w’uyu mukobwa yaje guhisha ko yakiriye indi nkwano ku buryo byatumye n’indi mihango yose irimo no gusezeranya umukobwa we n’undi mugabo ikorwa mu bwiru.

Gasore yifuza ko uyu muryango wamwishyura amafaranga ye, maze ubundi ugashyingira umwana wawo neza nta kibazo bafitanye.

Yagize ati “Icyifuzo n’uko bansubiza amafaranga yanjye nabahaye hanyuma bagakora ubukwe bwiza. Ikibazo mfite n’uko amafaranga yanjye nyabasaba bakambwira ngo ninkomeza kuyabasaba bazamfunga.”

Icyo umukobwa abivugaho

Uyu mukobwa we yabwiye IGIHE kuri telefone ko yaje guhindura icyemezo cyo gushakana na Gasore nyuma yo kumenya ko afite undi mugore n’abana batandatu.

Yagize ati “Ndakeka ko yakubeshye. Nkirangiza kwiga amashuri yisumbuye twakundaniye kuri telefone y’undi muntu w’umuturanyi, aza kunyibwira tukajya tuvugana, tuza gukundana nzi ko ari umusore kuko yanyohererezaga udufoto twe akiri muto. Yanyoherereje ibihumbi 500 Frw avuga ko ari ibyo gushaka ibyangombwa kugira ngo musange muri Amerika ariko ntibyari inkwano nk’uko abivuga.”

Akomeza avuga ko nyuma mukuru we, na we uba muri Amerika yaje kumubwira ko Gasore afite umugore n’abana batandatu ahita afata umwanzuro wo kudakomeza gukundana nawe, cyane ko yari yanamenye ko atari afite umugambi wo kumugira umugore ahubwo ngo yashakaga kujya amucuruza.

IGIHE ifite kopi y’urwandiko rw’amasezerano yashyizweho umukono mu 2016 hagati ya Gasore n’umuryango w’umukobwa yari yihebeye rugaragaza ko habayeho gutanga inkwano ndetse byanashimangiwe n’abagabo batandukanye bifuje ko amazina yabo adashyirwa ku karubanda.

Amasezerano y’inkwano yatanzwe

Ubutumire bugaragaza ko uyu mukobwa ari mu mushinga wo kurushinga n’undi musore

3,239 total views, 0 views today

Related Articles

Leave a Reply

Your email address will not be published. Required fields are marked *

Close