AhabanzaUbuzima

Nyanza: Abiga mu yisumbuye batangiye gupimwa Sida babasanze ku mashuri

Ubuyobozi bw’Akarere ka Nyanza bwatangiye igikorwa cyo gupima Sida abanyeshuri bose biga mu mashuri yisumbuye kugira ngo bamenye uko bahagaze ndetse hamenyekane n’uko ubwandu bwayo buhagaze mu bigo by’amashuri.

Icyo gikorwa kije gikurikira imibare yagaragaje ko mu Karere ka Nyanza no mu tundi turere tw’u Rwanda hari abangavu benshi batewe inda zitateguwe bibaviramo ingaruka mbi zitandukanye zirimo no kuva mu ishuri.

Imibare ya Minisiteri y’Uburinganire n’Iterambere ry’Umuryango (Migeprof), yerekana ko mu 2016 mu Rwanda hose abangavu bari hagati y’imyaka 16-19 bagera ku 17500 batewe inda zitateguwe.

Umuyobozi wungirije ushinzwe imibereho myiza y’abaturage mu Karere ka Nyanza, Solange Mutesi, avuga ko igikorwa cyo gupima Sida cyatangijwe ku mugaragaro ku wa 12 Gashyantare 2018; bityo nibamara gupima abanyeshuri bose bazafata ingamba z’ikigomba gukorwa mu rwego rwo gukumira ubwandu bushya no gufasha abanduye kwiyakira no kubaho neza.

Mutesi ati “Ni gahunda yatangijwe mu bigo by’amashuri yisumbuye byose byo muri Nyanza, turateganya gupima urubyiruko rurenga ibihumbi 20, nyuma yaho bitewe n’imibare tuzaba twabonye niho tuzafata ingamba z’ikigomba gukorwa”.

Uyu muyobozi akomeza avuga ko icyo gikorwa kiri kujyana no gutanga inyigisho ku buzima bw’imyororokere ndetse no gupima indwara y’igituntu na yo ikunze kuboneka mu bantu baba hamwe.

Bamwe mu bayeshuri bo mu mashuri yisumbuye mu Karere ka Nyanza bavuga ko iyi gahunda bayishimiye kandi biteguye kuyitabira.

Uwera Clarisse wiga mu mwaka wa gatandatu ati “Ni ubwa mbere ngiye kwipimisha Sida ariko inyigisho abaganga baduhaye zatumye numva ko ngomba kwipimisha nkamenya uko ubuzima bwanjye buhagaze”.

Igikorwa cyo gupima Sida mu bigo by’amashuri yisumbuye, akarere ka Nyanza kagifatanyije n’Imana y’Igihugu y’Urubyiruko, Ibitaro by’Akarere ka Nyanza n’Ibigo Nderabuzima.

Ubuyobozi bw’Akarere ka Nyanza buvuga ko kuba hatangiye igikorwa cyo gupima Sida, nta kidasanzwe cyabaye ahubwo bashaka gufata ingamba hakiri kare, kuko kuba hagaragara abangavu b’abanyeshuri batwara inda, bivuze ko baba bakoze imibonano mpuzabitsina idakingiye.

Abayobozi bo mu karere ka Nyanza mu gikorwa cyo gukangurira abanyeshuri kwipimisha Sida n’igituntu no kubaha inyigisho ku buzima bw’imyororokere

Bamwe mu banyeshuri bo mu Karere ka Nyanza bakurikiye inyigisho zibafasha kurinda ubuzima bwabo

Mbere y’uko abanyeshuri bapimwa babanza kwiyandikisha

Related Articles

Leave a Reply

Your email address will not be published. Required fields are marked *

Close