AhabanzaUbuzima

Minisante yakanguriye abanyarwanda gushyira ingufu mu kwirinda indwara kuruta kuzivuza

Minisiteri y’Ubuzima (Minisante) irashishikariza abanyarwanda kwita ku buzima bwabo hakiri kare bagashyira ingufu mu kwirinda indwara zitandukanye kuruta kuzivuza, kuko inyinshi zibibasira bishoboka ko bazirinda.

Umukozi muri Minisante uhagarariye ubuzima bw’umubyeyi n’ubw’umwana, Dr Bikorimana Ferdinand, yabivuze kuri uyu wa 25 Gashyantare 2018, ubwo yari mu Karere ka Nyanza yifatanyije n’ibitato byako kwizihiza umunsi mpuzamahanga wahariwe kwita ku barwayi.

Yahumurije abarwayi bo mu Bitaro bya Nyanza ababwira ko badakwiye kwiheba ariko nanone bakwiye gushyira ingufu mu kwirinda indwara no kwita ku buzima bwaho ntibabyibuke gusa iyo bafashwe n’indwara.

Yagize ati “Dushaka ko abantu birinda indwara, ibyo basabwa ni ukugira isuku, kubyarira kwa muganga, gukingiza abana, bakitabira kurwanya imirire mibi no kugwingira kandi bakirinda ziriya ndwara zitandura bakora imyitozo ngororamubiri ndetse bakurikiza n’amabwiriza tubagezaho abafasha kubungabunga ubuzima bwabo.”

Dr Bikorimana yakebuye abashinzwe kuvura batuzuza inshingano zabo ababwira ko bakwiye kwisubiraho kandi Minisiteri y’Ubuzima izakomeza kubashyigikira ibaha ibyangombwa byose.

Ati “Abaganga bacu turabasaba gufata neza abarwayi no kubaha serivise nziza, natwe tubari inyuma tuzabaha ibikoresho, tuzabaha amahugurwa, ibintu byose bazakenera tuzafatanya nabo babigereho kandi abarwayi na bo babone serivise nziza”.

Umuyobozi Mukuru w’Ibitaro bya Nyanza, Dr Pascal Ngiruwonsanga, yavuze ko hari indwara nyinshi ziganje mu baza kuhivuriza kandi zishobora kwirindwa.

Ati “Muri ibi bihe ku isonga hari indwara ya malariya aho ifata ikigero cya 43%, hakiyongeraho indwara zo mu buhumekero nazo zigenda zifata indi ntera, ku mwanya wa gatatu haza izitandura nk’umuvuduko w’amaraso, indwara z’umutima, diyabete n’izindi; ku mwanya wa kane haza izituruka ku mwanda”.

Abarwayi basobanuriwe ko izo ndwara zose zikunze kubibasira, inyinshi zishobora kwirindwa basabwa kubyitaho bakurikiza inama bagirwa.

Abarwayi bakorewe ibirori bahabwa n’impano

Mu kwizihiza umunsi mpuzamahanga wahariwe kwita ku barwayi, abarwariye ku bitaro bya Nyanza bakorerewe ibirori bahabwa n’impano zirimo ibiribwa n’ibikoresho by’isuku.

Bamwe mu barwayi baganiriye na IGIHE bavuga ko bishimira uyu munsi ngarukamwaka wabahariwe kuko kuri bo ubabera umwihariko wo kwitabwaho no gutanga ibitekerezo.

Aline Mukandayisenga ati “Uyu munsi ni mwiza kuri njye, nubwo ndwaye ndumva nagaruye icyizere ko nzakira; badukoreye ibirori, baduhaye impano, ndumva nishimye cyane”.

Ibitaro by’Akarere ka Nyanza byatangiye gukora mu 1931, bireberera ibigo nderabuzima 14; bitanga serivise z’ubuzima ku baturage basaga ibihumbi 547 bo muri ako karere n’abaturuka mu tundi turere bihana imbibi.

Umunsi mpuzamahanga wo kuzirikana abarwayi, washyizweho na Papa yohani Pawulo II mu 1992, wizihizwa ku rwego rw’Isi buri mwaka tariki ya 11 Gashyantare.

Abanyarwanda basabwe gushyira ingufu mu kwirinda indwara kuruta kuzivuza

Abarwariye mu bitaro bya Nyanza bagenewe impano

Abivuriza mu bitato by’akarere ka Nyanza bagenewe impano

Bamwe mu rubyiruko rwifatanyije n’abarwayi bivuriza ku bitaro bya Nyanza mu kwizihiza umunsi mpuzamahanga wabahariwe babazaniye impano

Ibitaro by’akarere ka Nyanza bitangirwamo serivise z’ubuzima zitandukanye

Umukozi muri Minisante uhagarariye ubuzima bw’umubyeyi n’ubw’umwana, Dr Bikorimana Ferdinand yasabye abanyarwanda gushyira ingufu mu kwirinda indwara

Related Articles

Leave a Reply

Your email address will not be published. Required fields are marked *

Close