AhabanzaUbuzima

Abajyanama b’ubuzima, umwihariko w’u Rwanda- Dr Ndimubanzi

Nk’uko byasobanuwe ejo hashize  n’Umunyamabanga wa Leta muri Minisiteri y’Ubuzima ushinzwe ubuzima rusange, Dr Ndimubanzi Patrick, yavuze ko  muri iyi nama u Rwanda rufite ibyo ruzasangiza abandi, nk’imikorere y’abajyanama b’ubuzima n’amavuriro y’ingoboka  afasha Leta kwegereza ubuvuzi Abanyarwanda.

Yagize ati “Gahunda y’abajyanama b’ubuzima n’amavuriro y’ingoboka ari hirya no hino mu gihugu bidufasha kwegereza ubuvuzi Abanyarwanda kuko ubuzima bwa buri wese bugomba kwitabwaho, bityo buri Munyarwanda akaba agomba kwivuza.”

Dr Ndimubanzi avuga ko ibi bikubiye no mu masezerano ya Bamako u Rwanda rwashyizeho umukono, rukaba rukora ibishoboka byose ngo Abanyarwanda babone ubuvuzi hafi yabo.

Yagarutse kuri gahunda yo kubaka ivuriro ry’ingoboka muri buri kagari k’igihugu, umwe mu myanzuro yafatiwe mu mwiherero w’abayobozi bakuru b’igihugu ko uzatuma gahunda yo kwegereza ubuvuzi abaturage yihuta kandi igakorwa neza.

Umunyamabanga wa Leta muri Minisiteri y’Ubuzima kandi yakomoje ku modoka zitwara abarwayi zigera kuri 5 muri buri bitaro by’ikitegererezo, akaba ari mu rwego rwo kugera ku barwayi b’indembe mu buryo bwihuse ngo bagezwe ku buvuzi.

Aha uyu muyobozi yaboneyeho umwanya wo gusaba amavuriro kujya bafata neza izi mbangukiragutabara kuko zikenerwa hato na hato ngo zigeze abarwayi kwa muganga kandi izishaje zigasanwa zigakomeza umurimo wazo.

Ku bijyanye n’ubuzima bw’imyororokere, Dr Ndimubanzi yavuze ko hakorwa byinshi ngo bubungabungwe, harimo gahunda zo kwigisha ubuzima bw’imyororokere mu rubyiruko, ibiganiro ku maradiyo na televiziyo bivuga ku buzima bw’imyororokere n’ibindi.

Belay Begashaw, Umuyobozi Mukuru wa gahunda y’intego z’ikinyagihumbi muri Afurika (SDGC/A) yagarutse ku bibazo byugarije umugabane w’Afurika birimo inzara n’imirire mibi, bikaba bigira uruhare mu gusubiza inyuma ubuzima bwiza bw’abatuye Afurika.

Yagize ati “Niba ushaka kurwanya imirire mibi n’inzara mu gihugu ni ngombwa guteza imbere urwego rw’ubuhinzi, kuko ibura ry’ibiribwa ari kimwe mu biteza ibibazo mu buzima bw’abaturage.”

Umuyobozi mukuru wa SDGC/A yongeraho ko amazi mabi ari mu bihangayikishije abaturage b’Afurika kuko atuma bahura n’uburwayi bunyuranye, iyi na yo akaba ari ingigo yo gushakira ibisubizo mu nama ku ntego z’iterambere rirambye iteranira i Kigali uyu munsi.

Imibare itangazwa n’Ishami ry’Umuryango w’Abibumbye ryita ku buzima (OMS), igaragaza ko mu mwaka  wa 2015 muri Afurika  abagore 303 000 bapfuye batwite cyangwa babyara, muri bo 99% ni abakomoka mu bihugu byo munsi y’ubutayu bwa Sahara.

Iri shami kandi rigaragaza ko   imfu z’abantu bakuru zagabanutseho 361/1000 kuva mu mwaka wa 1990 naho ku Isi zigabanuka ku kigero cya 306/1000 mu 2013.

Imfu z’abana bari munsi y’imyaka 5 zagabanutse ku kigereranyo cya 177/1000 kuva mu mwaka wa 1990 na 81/1000 mu mwaka wa 2015.

Aba bayobozi bombi basanga inama yiga kuri gahunda y’intego z’iterambere rirambye izafasha abashinzwe ubuzima mu bihugu by’Afurika gusangizanya ubunararibonye mu bijyanye n’ubuvuzi, u Rwanda na rwo nk’igihugu cyayakiriye rugasangiza abandi bimwe mu byagezweho mu rwego rw’ubuzima n’ubuvuzi byafasha abandi ndetse bakabyigiraho.

Insanganyamatsiko y’iyi nama ku buzima muri Afurika iragira iti “Ubuzima bwa buri wese bukwiye kwitabwaho.”

Related Articles

Leave a Reply

Your email address will not be published. Required fields are marked *

Close