AhabanzaAmakuruPolice

Nyabihu: Abaturage baganirijwe ku ruhare rwabo mu gukumira no kurwanya ibyaha

Polisi y’u Rwanda ikorera mu karere ka Nyabihu kuri uyu wa Kabiri Tariki   09 Ukwakira yasuye abaturage bo mu mirenge ya  Karago, Bigogwe,Jomba ,na Rugera yose yo mu karere ka Nyabihu.

Ibiganiro bahawe byibanze ku kubagaragariza uruhare rwabo mu kurwanya no gukumira ibyaha. Polisi kandi yanabagaragarije ko bafite uruhare rukomeye ku mutekano w’Igihugu cyan cyane barwanya ibiyobyabwenge.

Mu kiganiro cyatangiwe mu murenge wa Bigogwe ahari hateraniye abaturage bagera kuri 450 mu nteko  y’abaturage,Umuvugizi wa Polisi mu Ntara y’Amajyaruguru Chief Inspector of Police( CIP) Alex Rugigana yakanguriye abaturage kurwanya ibiyobyabwenge byo bikunze  kuba intandaro y’ibindi byaha.

Yagize ati:”Burya muzabigenzure ibyaha byinshi nko gufata ku ngufu abana b’abakobwa, gukubita no gukomeretsa,amakimbirane yo mu miryango n’ibindi byinshi byose biva ku businzi bwaturutse ku biyobyabwenge.”

Yakomeje abasaba guhagurukira hamwe bakarwanya ibiyobyabwenge bagatangira amakuru ku gihe ku nzego z’umutekano cyangwa abandi bayozi, bakagaragaza abantu bakoresha bakanakwirakwiza ibiyobyabwenge.

Mu murenge wa Karago hari hateraniye abaturage bagera ku gihumbi na 500(1500), CIP Rugigana yakanguriye abaturage  kurwanya ihohoterwa ryo mu ngo ,inda ziterwa abana b’abakobwa no kugira uruhare mu kwicungira umutekano bakora amarondo ya ninjoro.

Yagaragarije abaturage ko akenshi  ihohoterwa ryo  mu ngo rikunze guturuka ku miryango ibana itarasezeranye, asaba imiryango ibana itarasezerana  gusezerana vuba bishoboka.

Yagize ati:”Hari igihe usanga mu muryango umugabo n’umugore babana batarasezeranye, ibi bigatuma umugabo ahora avuga ko nta wundi muntu mu ryango ufite ijambo ku mutungo,ubwo amakimbirane agatangira ubwo.”

Yabasobanuriye ko amakimbirane mu miryango agira ingaruka mbi kandi zikomeye haba ku muryango ndetse n’Igihugu muri rusange.

Yagize ati:”Umuryango uhoramo amakimbirane ntushobora gutera imbere, abana ntibiga , ndetse hari igihe bituma hari ufungwa mu muryango cyane cyane umugabo. Ibi  bigira ingaruka zikomeye ku gihugu muri rusange kuko nibwo ubona abana b’inzererezi ndetse n’ubukene mu miryango.”

Abaturage basabwe kujya bihutira gutanga amakuru ku miryango ibanye nabi kugira ngo hashakwe umuti w’ikibazo hakiri kare.

Ibiganiro nk’ibi kandi byanabereye mu mirenge ya Jomba na Rugera.

Abaturage bavuze ko mu nteko z’abaturage ariho bagiye kujya bakemurira ibabazo bahura nabyo, ibyo badashoboye babishyikirize inzego z’ubuyobozi.Basezeranyije ubufatanye na  Polisi  n’izindi nzego mu kurwanya no gukumira ibyaha cyane cyane ibiyobyabwenge.

Related Articles

Leave a Reply

Your email address will not be published. Required fields are marked *

Close