AhabanzaAmakuruImyidagaduro

Nikolaj wakinnye muri Game of Thrones yavuze imyato u Rwanda mu kiganiro na Ellen DeGeneres

Muri Werurwe 2019 icyamamare muri sinema, Nikolaj Coster-Waldau, wubatse izina muri filime y’uruhererekane ya Game of Thrones yasuye u Rwanda, aganira n’ubuyobozi bw’Ikigo cy’Igihugu cy’Iterambere, RDB.

Yahavanye isura nziza y’uko igihugu gihagaze ndetse yanabihamirije mu kiganiro cya Ellen Show gikorwa n’Umunyarwenya Ellen DeGeneres.

Ibihe uyu mugabo yagiriye mu Rwanda byagarutsweho mu kiganiro Ellen DeGeneres yatumiyemo Nikolaj Coster-Waldau.

Ellen yabajije Nikolaj uko yabonye u Rwanda ubwo yarusuraga ndetse anamubaza niba azi ko ari kuhubaka ikigo cyita ku ngagi cyizitwa Ellen DeGeneres Campus.

Nikolaj yabwiye Ellen ko iyo umuntu ageze mu Rwanda asanga buri wese amuvuga kubera ko yashyizeho uburyo imishinga ya Dian Fossey yo kwita ku ngagi izakomeza gukora kandi bukaba ari ubufasha bwari bukenewe.

Uyu mugabo w’imyaka 48 yavuze ko yatangajwe no kuba yarasanze abanyarwanda bazi Game of Thrones yakinnyemo kandi buri wese wayirebye akayikunda byimazeyo banashishikajwe n’agace gashya.

Arakomeza ati “Nagiye hariya binyuze mu Muryango w’Abibumbye gusa sinzi icyo mwaba muzi ku Rwanda, gusa mu myaka 25 ishize habaye ibintu biteye ubwoba, Jenoside. Ndetse njyayo nateganyaga kubona igihugu kiri mu kajagari gusa byari bitandukanye kuko bafashe ingamba babitekerezaho neza bakavuga bati ibi bintu ntabwo bikwiriye kongera kubaho ukundi, ibintu byose bashyira hamwe, abagore 62% bari mu Nteko Ishinga Amategeko naho 50% ni abagore bari muri Guverinoma. Ni igihugu cyiza cyane.”

Ellen yamubajije niba yarahuye na Perezida Kagame undi asubiza ko atagize ayo mahirwe, Ellen amubwira ko ari umugabo wihariye wakoze ibishoboka byose ngo igihugu cyongere kugira umutekano nyuma ya Jenoside yakorewe Abatutsi ndetse ubu kikaba kinafite umwihariko wo kugira isuku kandi buri wese agaragaza akanyamuneza.

Nikolaj nawe yahise amwunganira avuga isuku yasanze mu Rwanda, agaruka ku bikorwa bitandukanye birimo n’umuganda ngarukakwezi ukorwa n’abaturage.

Yavuze ko u Rwanda ari igihugu cy’agatangaza kandi cy’intangarugero muri Afurika aho yemeje ko uko yarukekaga n’uko yarusanze bihabanye cyane kuko rufite byinshi byiza kandi by’umwihariko.

Ati “Ni igihugu gifite isuku ahantu hose. Igitekerezo bafite cyo guteganyiriza ahazaza ni ibintu bihamye ntabwo bashaka ko hongera kubaho amakosa nk’ayabaye. Ahazaza h’Umujyi wa Kigali bashaka ko 100% amashanyarazi azaba ari hose kandi hari n’uburyo rusange bwo gutwara abantu.”

“Ibi bintu byose ni byiza! Nahuye n’abaminisitiri ndavuga nti se ibijyanye n’ubushabitsi byo bimeze bite? Bansubiza ko ari ibintu biri kuzamo impinduka kandi ni ibintu byumvikana. Mu myaka 10 ishize baciye ibikapu bya pulasitiki ndetse ubu bashaka guca amacupa ya pulasitiki n’ibindi bikoresho bya pulasitiki bikoreshwa rimwe gusa.”

Ellen yahise nawe avuga ko ajya kuza mu Rwanda abantu bagiye bamuca intege bamubwira ibintu bitandukanye bibi ariko ahageze asanga ni igihugu cyihariye.

Ati “Ni igihugu cyihariye. Nanjye nagize ibyiyumviro nk’ibyawe ku Rwanda, ni igihugu cyiza ariko abantu benshi bari banteye ubwoba mbere y’uko ngerayo bati ntabwo warya, ntiwanywa amazi.”

Nikolaj yishimira ibihe yagiriye mu Rwanda n’uko yasanze igihugu kimeze

Mu ruzinduko rwe mu Rwanda, Nikolaj yahuye n’abantu b’ingeri zitandukanye bamusobanuriye byinshi ku rugendo igihugu cyashyize imbere

Ubwo Nikolaj yazaga mu Rwanda yagiranye ibiganiro n’abayobozi batandukanye

Portia, umukunzi wa Ellen ubwo yari mu Rwanda yishimiye ibihe byiza yagiriye muri Pariki y’Ibirunga

Ellen na Nikolaj bavuze ko u Rwanda ruri mu bihugu byiza kandi bifite umutekano usesuye

Related Articles

Leave a Reply

Your email address will not be published. Required fields are marked *

Close