AhabanzaPolitikiRwanda

Banki y’Isi igiye gushora miliyoni $ 200 mu kugabanya ubucucike mu mashuri y’u Rwanda

Guverinima y’u Rwanda na Banki y’Isi biri mu biganiro bigamije gutangiza umushinga wa miliyoni zigera kuri 200 z’amadolari, azifashishwa mu kugabanya ubucucike mu mashuri.

Mu Rwanda by’umwihariko mu mashuri abanza n’ayisumbuye hari ibyumba by’amashuri kimwe kiba kibarirwa abanyeshuri 70 mu gihe Ishami ry’Umuryango w’Abibumbye ryita ku burezi, ubumenyi n’umuco (UNESCO), riteganya ko nibura umwarimu agomba kwigisha abanyeshuri bari hagati ya 30 na 35.

Muri gahunda ya Guverinoma y’imyaka irindwi ya Guverinoma harimo kugabanya umubare w’abanyeshuri mu byumba by’amashuri hagamijwe guteza imbere ireme ry’uburezi.

Ku gicamunsi cyo kuri uyu wa Gatanu Minisitiri w’Intebe Dr Edouard Ngirente yakiriye mu biro bye Hafez Ghanen, Umuyobozi wungirije wa Banki y’Isi ushinzwe Afurika baganira ku mishinga itandukanye irimo uwo guteza imbere uburezi bw’u Rwanda.

Hafez yabwiye itangazamakuru ko baganiriye ko mushinga wa miliyoni 200 z’amadolari uzibanda ku kongera ibyumba by’amashuri no gushyira ibikoresho bihagije mu mashuri.

Yagize ati “Minisitiri w’Intebe yagaragaje akamaro k’uburezi mu iterambere ry’ubukungu no guhangana n’ubukene. Yagaragaje n’uburyo hakenewe amashuri menshi n’ibyumba by’amashuri byinshi. Ubu turi gutegura umushinga wa miliyoni 200 z’amadolari wo gutera inkunga intego z’u Rwanda zo kugira uburezi bwiza.”

Ghanen yavuze ko ibiganiro bigikomeje hagati y’impande zombi ku buryo nta gihindutse muri Kanama uyu mwaka amasezerano y’ubufatanye azaba yasinywe.

Minisitiri w’Imari n’Igenamigambi, Dr Uzziel Ndagijimana yavuze ko uwo mushinga nushyirwa mu bikorwa uzafasha u Rwanda guteza imbere ireme ry’uburezi binyuze mu kugabanya umubare w’abanyeshuri byumba by’amashuri.

Yavuze ko 70 % by’ayo mafaranga azashorwa mu kubaka amashuri no kugura ibikoresho byifashishwamo gusa.

Dr Ndagijimana yavuze ko umushinga nutangira uzamara hagati y’imyaka itatu n’itanu.

Minisitiri w’Intebe Ngirente na Ghanen banaganiriye ku yindi mishinga impande zombi zafatanyamo irimo uwo kurwanya imirire mibi mu bana, ubuhinzi, guhangana n’imihindagurikire y’ibihe ndetse no kurwanya ruswa.

Mu gitondo cyo kuri uyu wa Kane hari andi masezerano Banki y’Isi yasinyanye na Guverinoma y’u Rwanda ya miliyoni 71 z’amadolari arimo azifashishwa mu buhinzi n’andi azifashishwa mu kuzamura imibereho y’impunzi n’abaturage batuye hafi y’inkambi.

Minisitiri w’Intebe Dr Ngirente na Ghanen baganiriye ku guteza imbere uburezi mu Rwanda

Mu byaganiriwe harimo umushinga wa miliyoni 200 z’amadolari azifashishwa cyane cyane mu kugabanya ubucucike mu mashuri

Ghanen yavuze ko ya Banki y’Isi ari ugufasha u Rwanda kugera ku iterambere rirambye

Abayobozi muri Banki y’Isi na Minisitiri w’Intebe Ngirente bafata ifoto y’urwibutso

Related Articles

Leave a Reply

Your email address will not be published. Required fields are marked *

Close