AhabanzaAmakuruRwandaUbuzima

Ngororero: Abagore babyarira kwa muganga bageze ku kigereranyo cya 91%

Ubuyobozi bw’Akarere ka Ngororero burishimira intambwe yatewe mu kubungabunga ubuzima bw’abaturage binyuze muri gahunda zitandukanye zagiye zishyirwaho atari muri aka karere gusa, ndetse n’ibikorwa remezo byegereza abaturage serivisi z’ubuvuzi aho by’umwihariko abagore bitabira kubyarira kwa muganga bageze kuri 91%.

Ubu bwitabire bufitanye isano n’ibikorwa by’abajyanama b’ubuzima bakurikiranira hafi ubuzima bw’ababyeyi n’abana ndetse no kuba gahunda y’ubwisungane mu kwivuza ituma nta muturage ukirembera mu rugo igihe arwaye.

Hari kandi ubwiyongere bw’ibikorwa remezo by’ubuvuzi birimo ibigo nderabuzima byavuye kuri birindwi mu mwaka wa 1994 ubu bikaba bigeze kuri 15, ibi bikajyana no kubaka inzu abagore babyariramo nk’uko byatangajwe n’Umuyobozi w’Akarere ka Ngororero, Ndayambaje Godefroid.

Yagize ati “Hubatswe ibigo nderabuzima bigera ku munani, ubundi twari dusanzwe dufite birindwi gusa, ubu bimaze kuba 15.

Hubatswe inzu abagore babyariramo zigera kuri zirindwi ku bigo nderabuzima bitandukanye bitazigiraga twavuga nk’Ikigo Nderabuzima cya Ntobwe, Nyange A na Nyange B, Muhororo, Ramba, Muramba na Ntaganzwa.”

Yakomeje agira ati “Ibi byatumye umubare w’abagore bitabira kubyarira kwa muganga wiyongera ubu ugeze kuri 91% mu gihe mbere wasangaga ababyitabira bari bakiri bake kuko n’ibitaro byari bike bidafite n’ibikoresho byuzuye ariko uyu munsi ni ikintu gishimishije. Mu bijyanye no kuboneza urubyaro twavuye kuri 27% ubu tugeze hafi kuri 49%.”

Akarere ka Ngororero gafite amavuriro mato (Poste de Santé) 25 hirya no hino mu mirenge afasha abaturage kwivuza mu buryo bworoshye ndetse n’ibigo mbonezamikurire by’abana bigeze ku 8 by’ikitegererezo.

Ibi bigo bifasha mu gukurikirana imikurire y’abana byatumye abana bose bari bafite imirire mibi babasha kuyivanwamo muri uyu mwaka w’ingengo y’imari urangiye.

Meya Ndayambaje ati “Mbere y’imyaka 25 nta muntu witaga ku mwana ufite imirire mibi ariko ubu twafashe ingamba zigamije kugabanya umubare wabo, icya mbere twagombaga kwitaho cyane ni ukumenya ko abo bana tubafite. Uyu mwaka twari dufite abana 600 ariko urangiye twesheje umuhigo bose barakize.”

Kwita ku buzima bw’umubyeyi n’umwana ngo bijyana no kubungabunga isuku yaba iy’ibiribwa, imyambaro, aho abantu batuye n’ubwiherero kuko ari ibintu byuzuzanya kandi bikazana impinduka mu baturage.

Muri aka karere imiryango isaga ibihumbi 17 itaragiraga ubwiherero yamaze kubwubakirwa. Mu gukumira indwara z’ibyorezo ubu kari kuri 1.9%.

Related Articles

Leave a Reply

Your email address will not be published. Required fields are marked *

Close