AhabanzaAmakuruImyidagaduro

AMAFOTO:Buravan yeretse itangazamakuru igihembo cya Prix Découvertes RFI 2018

Nyuma yuko umuhanzi Burabyo Yvan [Buravan] umaze kubaka ibigwi mu Rwanda, nk’umuririmbyi ufite ubuhanga by’umwihariko ijwi rye rigakundwa na benshi, yeretse itangazamakuru igihembo cya Prix Découvertes RFI 2018, yegukanye mu Ugushyingo umwaka ushize, anaranarishimira byihariye.

Ni igikorwa cyabaye ku mugoroba wo kuri uyu wa Gatatu, aho uyu muhanzi yifuje guhuriza hamwe ibitangazamakuru bitandukanye bikorera mu Rwanda akabishimira ndetse abiha n’icyemezo cy’ishimwe.

Mu ijambo rye Buravan yashimiye byimazeyo itangazamakuru ridahwema kumuba hafi umunsi ku wundi akabasha kuba ageze ku rwego ariho uyu munsi.

Ati “Ni intsinzi yacu twese ni nayo mpamvu nazanye iki gikombe ngo mubashe kukibona abenshi bari bakibonye mu mashusho bakimpa. Ni inshuro ya mbere nkerekanye kuva ubwo bakimperaga mu Bufaransa rero naratashye nibaza uburyo ndibuze kucyerekana, ndavuga nti ikintu cyaba cyiza ni uko umuntu wese wakigizemo uruhare agomba kukibona akaba yagikoraho akaba yanacyifotorezaho kuko ari icyacu twese.”

Yavuze ko amaze imyaka ine akora umuziki ariko akaba atari akazi koroshye kakorwa n’umuhanzi waba adafite itangazamakuru hafi ye ngo rimenyekanishe ibyo akora.

Ati “Ndabashimira cyane. Maze imyaka ine ndi muri akazi, ni akazi katoroshye, udashobora gukora wenyine n’ubwo waba ufite imbaraga zidasanzwe mu bundi buryo, ariko koroshywa n’abatuma kagera hanze kuko iyo kakiriwe ni nabyo bidusubizamo imbaraga tukagasubiramo noneho tugakora buri munsi.”

Uyu muhanzi yashishikarije urubyiruko ruhora ruvuga ko akazi kabuze kujya mu bijyanye n’ubuhanzi n’ubugeni kuko nawe abijyamo yumvaga azaba umuhanzi uzajya aririmba abantu bakamumenya ariko atazi niba byavamo ubuzima.

Ati “Iyo hatabayeho gucika intege ibintu byinshi bishobora kugerwaho. Sinigeze mvuga ngo ndategura ijambo, iki ni igikombe cy’amarangamutima cyo kubashimira ko akazi dukorana mukubaha kandi mugaha agaciro.”

“Numva mu bukangurambaga twakora bigendanye n’uko urubyiruko rwinshi rudafite akazi, twashishikariza abantu gukora ubuhanzi n’ubugeni by’umwuga ababikunze babishoboye ndetse n’abashoramari bakaba babishyiramo imari. Ndabivuga nk’uwabibonye.”

Ku wa 8 Ugushyingo 2018, nibwo Buravan yegukanye igihembo cya Prix découvertes RFI 2018. Yari mu bahanganiye igihembo gitangwa na Radiyo Mpuzamahanga y’Abafaransa, RFI, gihabwa abahanzi b’abahanga mu muziki baturuka mu bihugu bitandukanye muri Afurika no hanze yayo.

Buravan yinjiye mu irushanwa ubwo yagiye i Burayi kuhakorera ibitaramo. Yabanje kwiyandikisha atanga n’ibisobanuro birambuye kuri we nk’umunyamuziki, baza kumutoranya. Icyiciro cyakurikiyeho cyari ugutanga indirimbo hanyuma akanama nkemurampaka kakazumva, kagahitamo icumi ba mbere muri Afurika.

Yahaye akanama nkemurampaka indirimbo enye zisanzwe zinakunzwe bikomeye mu Rwanda, iyitwa ‘Malaika’, ‘Oya’, ‘Just a Dance’ ndetse na ‘Garagaza’.

Yari ahatanye n’abarimo; Umunya-Guinée witwa Azaya, Barakina wo muri Niger, Iyenga wo muri RDC , OMG wo muri Sénégal, Umunya-Cameroun witwa Gasha, Ozane wo muri Togo, Biz Ice wo muri Congo Brazaville, Maabo ukomoka muri Sénégal na Geraldo wo muri Haïti.

Buravan yegukanye igihembo cy’amayero ibihumbi icumi [€10,000] ndetse no gufashwa gukora ibitaramo bizenguruka Afurika na kimwe gikomeye uyu muhanzi yakoreye i Paris mu Bufaransa.

DSC_0312

Related Articles

Leave a Reply

Your email address will not be published. Required fields are marked *

Close