AhabanzaAmakuruHanze

FBI yasabwe iperereza kuri FaceApp ihindura amasura y’abantu ishobora gushyira benshi mu kaga

Application ya FaceApp ikomeje gukoreshwa na benshi ku Isi utaretse no mu Rwanda, barimo kwishimira kureba amafoto agaragaza uko baba bameze umunsi bashaje cyangwa se ikindi gihe bitewe n’icyo umuntu ahisemo, ndetse abenshi barimo kubikora umusubizo mu cyiswe #faceappchallenge.

Nyamara bihereye ku bahanga mu by’ikoranabuhanga, abantu benshi batangiye kuyikemanga bakimara kumenya ko icyicaro cyayo ari mu Burusiya, cyane ko icyo gihugu kimaze kumenyekana mu kwiba amakuru mu ikoranabuhanga, ku mpamvu zirimo n’ubutasi.

Senateri Charles E. Schumer uhagarariye Leta ya New York mu Nteko Ishinga Amategeko ya Amerika, kuri uyu wa Gatatu yandikiye Umuyobozi w’Ibiro bya Amerika Bishinzwe Ubugenzacyaha, FBI, Christopher A. Wray, amumenyesha ko FaceApp iteye impungenge ku mutekano w’igihugu no ku busugire bwa miliyoni z’Abanyamerika, nk’ikigo gifite icyicaro mu Mujyi wa Saint Petersburg mu Burusiya.

Iyi application ikoresha ubwenge bw’ubukorano (Artifficial Intelligence) mu gufasha umuntu kubona uko yazaba ameze akuze, akiri muto cyangwa afite ikindi gitsina, nyamara kugira ngo ayikoreshe abanza gushyiramo amakuru ye n’amafoto.

Senateri Schumer ati “Bijyanye n’amabwiriza y’umutekano yayo, abakoresha FaceApp bayiha uburenganzira bwo gukoresha cyangwa gutangaza ibyo wayisangije, harimo n’izina bakoreshaho cyangwa amazina yabo bwite, hatabayeho kubanza kubimenyeshwa cyangwa guhabwa indishyi.”

“Muri ubwo buryo, guha umuntu uburenganzira bungana butyo ku makuru bishobora gusobanura ko amafoto yose yafashwe n’iyi application yazakoreshwa ku karubanda cyangwa mu bundi buryo mu gihe kiri imbere, hatitawe ku bushake bwa nyirayo.”

Ikindi uyu musenateri yavuze ko kidafututse ni igihe iyi application imarana aya makuru y’umuntu cyangwa ngo amenye niba asibwa iyo amaze gukora icyo yashakaga.

Ibyo ngo bishobora gutuma amakuru cyangwa amafoto bikoreshwa mu zindi nyungu, ku buryo hari impungenge zikomeye ku buryo amakuru y’abantu arindwa.

Senateri Schumer yakomeje avuga ko noneho kuba FaceApp iherereye mu Burusiya nk’igihugu gihora gihanganye na Leta Zunze Ubumwe za Amerika mu by’ubutasi, hari impungenge z’igihe amakuru y’abanyamerika yagwa mu maboko y’amahanga ahanganye na Amerika.

Ati “Byaba bibabaje cyane amakuru akomeye y’abanyamerika ahawe igihugu cy’amahanga gikomeje kugira uruhare mu bikorwa by’ikoranabuhanga bibangamiye Leta Zunze Ubumwe za Amerika. Bijyanye n’uburyo FaceApp irimo kwitabirwa n’abantu benshi ni zo mpungenge ku mutekano w’igihugu n’uw’abantu ku giti cyabo, ndasaba ko FBI isesengura niba amakuru yashyizwe kuri FaceApp na miliyoni z’abanyamerika, adashobora kugwa mu biganza bya Guverinoma y’u Burusiya cyangwa ibigo bifitanye imikoranire na guverinoa y’u Burusiya.”

“Bibaye byo, ndasaba ko FBI ifata ingamba mu gukumira ingaruka zaterwa no kugera kuri ayo makuru. Byongeye, ndasaba Komisiyo Ishinzwe Ubucuruzi (FTC) kureba niba hari uburyo buhamye bwarinda ubusugire bw’Abanyamerika bakoresha iyi application barimo abakozi ba leta n’ab’inzego za gisirikare, bitabaye ibyo, abaturage bakamenyeshwa ingaruka ziri mu gukoresha iyi application cyangwa iziteye nka yo.”

Uyu musenateri yashimangiye ko bijyanye n’ikoranabuhanga rigezweho ryo kugenzura amasura, abaturage bakwiye kumenya uko ibintu bihagaze kugira ngo amakuru yabo n’ibindi bibaranga bikomeza gutekana.

Ibyo ngo bigira agaciro n’ibisobanuro bikomeye iyo bigeze kuri guverinoma zifitanye ibibazo na Leta Zunze Ubumwe za Amerika.

Senateri Charles E. Schumer yagaragaje ko umutekano w’abanyamerika uri mu kaga kubera iyi application ikorera mu Burusiya

Related Articles

Leave a Reply

Your email address will not be published. Required fields are marked *

Close