AhabanzaAmakuruRwanda

Ntimukabone ikoranabuhanga ngo mwumve mwareba filime z’urukozasoni -Minisitiri Mbabazi abwira urubyiruko

Minisitiri w’Urubyiruko Rosemary Mbabazi, yabwiye urubyiruko ko rugomba gutekereza uko rwabyaza umusaruro ikoranabuhanga aho kumva ko ari iryo kureberaho filime z’urukozasoni.

Ni mu butumwa yahaye abagera ku 124 baturuka mu bihugu 26 byo muri Afurika y’Uburasirazuba n’Amajyepfo bitabiriye amahugurwa y’ibyumweru bibiri abera mu kigo cya SOS Hermann Gemeiner Rwanda mu Mujyi wa Kigali.

Uru rubyiruko rusanzwe rufashwa na SOS Children’s villages International, ruri mu mashuri makuru na za kaminuza mu byiciro bitandukanye. Rurahugurwa ku bukangurambaga, ubuyobozi no kwihangira imirimo ariko bikozwe hifashishijwe ikoranabuhanga nk’ikivumbikisho cy’iterambere.

Minisitiri w’urubyiruko Rosemary Mbabazi atangiza aya mahugurwa ku mugaragaro yasabye uru rubyiruko kugira uruhare mu mpinduka rwifuriza Afurika ruhereye aho rukomoka.

Ati “Ntimukabone ikoranabuhanga ngo mwumve mwareba filime z’urukozasoni, ahubwo mujye mutekereza uko mwaribyaza umusaruro […] Mureke kuvuga ngo Afurika izahinduka ryari, mube ari mwe mwiheraho, mugire icyo mukora kandi uyu munsi, ntimutegereze ejo”.

Yababwiye kandi ko kugira ngo umuntu amenye ko yaba umuyobozi mwiza, yiheraho yiyobora ku giti cye. Yabasabye kujya barangwa n’ingeso nziza kandi igihe cyose, kugira ishyaka n’ubushake buhozaho bwo gukora ibibafitiye akamaro bo na sosiyete bakomokamo.

Minisitiri Mbabazi yakomoje kandi ku banyafurika benshi biganjemo urubyiruko barohama mu nyanja bagiye gushaka imibereho i Burayi mu buryo butemewe, asaba uru rubyiruko guhaguruka rukagira icyo rukora ngo uyu mugabane uhinduke, abandi bazawuvukiramo ntibazifuze gusiga iwabo ngo bajye kuba iw’abandi mu buryo butanemewe.

Umukozi wa SOS Children’s villages ushinzwe ubujyanama muri gahunda z’iterambere no kubakira urubyiruko ubushobozi mu karere ka Afurika y’Uburasirazuba n’iy’Amajyepfo Daniel E. Ihansekhein, yavuze ko bahisemo kuza gukorera aya mahugurwa mu Rwanda kuko rufite aho rugeze heza mu ikoranabuhanga.

Hari kandi intambwe rwateye mu kwemerera abanayfurika kuza mu gihugu bitagoranye no kuba ari igihugu gifite abantu bakiri bato muri guverinoma, ibintu bizera ko bizatera umurava uru rubyiruko.

Ati “Muri iyi minsi nta kintu wageraho vuba udafite ikoranabuhanga. Turashaka ko aba bana bacu bamenya uko bakoresha ikoranabuhanga mu guhindura ubuzima”.

Umuyobozi wa SOS Children Villages mu Rwanda, Liberal Seburikoko yavuze ko bahisemo guhugura iki cyiciro kugira ngo abakirimo bazisange mu buzima bubategereje nyuma yo kwiga.

Ati “Bigamije kubategurira icyiciro gikurikira nyuma yo kwiga. Ubuyobozi, ubukangurambaga bushingiye ku ikoranabuhanga, ribajyana ku ntego zabo no kwihangira imirimo”.

Urubyiruko rwitabiriye aya mahugurwa rwavuze ko rufite icyizere cyo kuzavanamo ubumenyi buzarufasha gutangira kugira icyo rukora ngo ruhindure ubuzima bwarwo n’abari hafi yarwo.

Mwanaidi Makame Juma uwavuye muri Zanzibar yabwiye IGIHE ko ibiganiro bahawe na Minisitiri w’urubyiruko w’u Rwanda byamuteye imbaraga zo kumva ko nawe hari icyo yakora ahereye mu rugo iwabo n’abo baturanye.

SOS Children’s villages ikorera mu bihugu 47 byo ku mugabane wa Afurika. Ifasha abana baturuka mu miryango itishoboye mu kwiga, kwambara, gufasha imiryango yabo kubona uko ibaho mu buzima bwa buri munsi, ndetse ikanabakurikirana kugeza bageze aho bashobora kwibeshaho nyuma yo kurangiza amasomo.

Abitabiriye amahugurwa bumva impanuro za Minisitiri w’Urubyiruko Rosemary Mbabazi

Minisitiri w’Urubyiruko Rosemary Mbabazi yasabye urubyiruko kubyaza umusaruro ikoranabuhanga

Urubyiruko rwitabiriye amahugurwa rwaturutse mu bihugu 126 byo muri Afurika y’Iburasirazuba n’Amajyepfo

Minisitiri Rosemary Mbabazi yasabye urubyiruko kudakoresha ikoranabuhanga mu bitabafitiye akamaro

Related Articles

Leave a Reply

Your email address will not be published. Required fields are marked *

Close