AhabanzaAmakuruRwanda

Rwamagana: Imirire mibi y’abana babo yatumye bacukura ibyuzi by’amafi byatangiye kubaha inyungu

Itsinda ry’abagore n’abagabo bo mu Mudugudu wa Kavura mu Murenge wa Kigabiro, ryakomotse ku kuba abana babo baragaragaraga mu mirire mibi rifite ibyuzi bibiri by’amafi, buri munyamuryango akagira urukwavu, ihene n’inkoko iwe mu rugo babonye bitewe no kwishyira hamwe ngo barwanye iyo mirire mibi.

Mu 2017 mu Karere ka Rwamagana hapimwe abana bose bari munsi y’imyaka itanu hagamijwe kureba uko ikibazo cy’imirire mibi gihagaze, icyo gihe mu Karere kose habonetse abana 644 barimo barindwi babonetse mu mudugudu wa Kavura uherereye mu Murenge wa Kigabiro.

Ubuyobozi bw’uyu mudugudu bufatanyije n’abajyanama b’ubuzima bahise bashyira hamwe ababyeyi b’aba bana barindwi batangira kubigisha uko hategurwa indyo yuzuye bakoresheje igikoni cy’umudugudu, abo bana ngo bahise bava mu muhondo n’umutuku ariko abo babyeyi bakomeza guhurizwa hamwe.

Nyuma ngo hagiye hongerwamo n’abandi babyeyi biza guhinduka itsinda rikomeye ryiswe ‘Tumurere Neza’ ubu rifite abanyamuryango 30 bose baturuka muri uyu mudugudu.

Gahongayire Josiane wari ufite umwana wagaragaraga mu mutuku yabwiye IGIHE ko umwana we yarafite ibiro bitatu ariko ngo nyuma yaho yigishirijwe guteka ku gikoni cy’umudugudu umwana we yahise azamuka agira ibiro icyenda.

Yagize ati “Ubundi iyo urebye usanga mu bituma umwana agaragara mu mirire mibi bituruka ku bujiji bwacu nk’ababyeyi, kuko imboga n’ibindi nkenerwa usanga byose tuba tubifite. Ubu muri iri tsinda bamaze kumpa ihene, inkoko, urukwavu ndetse niyo barobye baduha amafi yo gutekera abana bacu.”

Umujyanama w’ubuzima muri uyu mudugudu wa Kavura, Mukakibibi Jeanne, avuga ko nyuma yo kubona ko gushyira hamwe ababyeyi bafite abana bari munsi y’imyaka itanu bitanga umusaruro, biyemeje kugumana mu itsinda, ngo niyo hari undi ubonetse bamwongeramo kugira ngo bakomeze babigishirize hamwe.

Yakomeje agira ati “Ubu tumaze umwaka n’igice nta mwana wo muri uyu mudugudu uboneka mu mutuku cyangwa mu muhondo, ntakindi tubikesha uretse gukorera hamwe mu itsinda, ababyeyi bose bafite abana bakiri bato baba muri iri tsinda ku buryo bitworohera kubakurikirana kandi na bo bikabafasha mu kwiteza imbere kuko bagenda bagurizanya amafaranga.”

Umuyobozi w’iri tsinda Uwingabire Annualite, yabwiye IGIHE ko iri tsinda ryatangiye rishingiye ku babyeyi bari bafite abana bari munsi y’imyaka itanu bagaragaraga mu mirire mibi, ngo bamaze kubigisha basanga guhamana hamwe ari byiza.

Yakomeje avuga ko nyuma yo kubona ko abanyamuryango bari gutera imbere biyemeje korora amafi azajya abafasha mu mikurire myiza y’abana babo, andi bakayagurisha.

Ati “Dufite ibyuzi bibiri buri cyuzi twagishyizemo amafi 1400, amafi abyara nyuma y’amezi atatu twe tukaroba mu mezi umunani, iyo twarobye amafi amwe tuyaha abanyamuryango bakajya gutekera abana babo, andi tukayagurisha ikiro tugitangira 2500”.

“Amafaranga avuyemo amwe tuyagura ibiryo by’amafi andi tugakomeza kuyagurizanya mu itsinda tukayungukira. Ubu kuri konti dufiteho ibihumbi 200 mu gihe ibindi 300 FRW biri mu banyamuryango aho twayabagurije kugira ngo barusheho kwiteza imbere.”

Imbogamizi mu bworozi bw’amafi

Uwingabire yakomeje agira ati “Imbogamizi ya mbere dufite niyo kubona ibiryo by’amafi, niyo bibonetse biba bihenze cyane ikilo tukigura amafaranga 970 mu gice cyahariwe inganda i Masoro. Mu minsi ibiri dusabwa nibura dushyiramo ibilo 20. Tubonye imashini ikora ibiryo by’amafi twaba tworohewe cyane kuko kugura ibyo tuzishyiramo byatworohera.”

Iri tsinda rya Tumurere neza ribarizwamo abanyamuryango 30 barimo abagore 28 n’abagabo babiri, bafite igikoni cy’umudugudu kiriho akarima k’igikoni kariho imboga z’amoko yose, buri munyamuryango wese yorojwe urukwavu, inkoko n’ihene bibafasha mu kugaburira abana babo indyo yuzuye.

Amafaranga bakuye mu burobyi bw’amafi amwe barayagurizanya andi bakayajyana kuri konti

Ikilo cy’amafi bakigurisha 2500 Frw

Muri iri tsinda harimo abagore bazi kuroba

Umuyobozi w’iri tsinda rya Turere neza Uwingabire Annualite avuga ko iri tsinda ryatumye nta mwana ukiboneka mu mirire mibi

Related Articles

Leave a Reply

Your email address will not be published. Required fields are marked *

Close