AhabanzaAmakuruRwanda

Guverinoma igiye gukoresha miliyari 12 Frw mu kubaka ibyumba by’amashuri

Guverinoma y’u Rwanda yatangaje ko iteganya gukoresha miliyari 12 Frw mu iyubakwa ry’ibyumba by’amashuri bishya bigera ku bihumbi bitatu, mu mashuri abanza n’ayisumbuye.

Umuyobozi Mukuru w’Ishami ry’Igenamigambi muri Minisiteri y’Uburezi, Baguma Rose, yatangaje ko iki gikorwa kije nyuma y’aho Minisiteri y’Imari n’Igenamigambi yongereye ingengo y’imari mu bijyanye n’uburezi.

Ibi byumba by’amashuri bizafasha kugabanya ingendo abanyeshuri bakoraga cyane mu bice by’icyaro bajya ku mashuri.

Muri iyi gahunda nshya, guverinoma izubaka ibyumba by’amashuri 1100, ubwiherero burenga 1000, hanafashwe uburyo abarimu n’abanyeshuri bagerwaho na bimwe mu bikoresho by’ishuri.

Baguma yagize ati “Iyi ni gahunda ya guverinoma igamije kuzamura ireme ry’uburezi mu gihugu, gahunda ni uko nta munyeshuri uzongera gukora ibilometero bibiri ajya gushaka ishuri.”

Mu ngengo y’imari 2016/2017, ibyumba by’amashuri 416 byarubatswe hanubakwa ubwiherero 470, umwaka wakurikiye hubatswe ibyumba by’amashuri 1,043 n’ubwiherero 1,344, naho mu ngengo y’imari 2018/2019 hubatswe ibyumba byamashuri 1776 n’ubwiherero 1452.

Baguma yavuze ko Banki y’Isi yiyemeje gutanga miliyoni 200 z’amadorali ya Amerika mu gice cy’uburezi muri uyu mwaka.

Igice kimwe cy’iyi nkunga kizakoreshwa mu gutanga ibindi byumba by’amashuri ibihumbi 27 n’ubwiherero 3600, ibi bikazatuma ibyumba byose by’amashuri bigera ku bihumbi 38.

Minisitiri w’Imari n’Igenamigambi, Uzziel Ndagijimana yabwiye The New Times ko iyi nkunga izafasha kongera ireme ry’uburezi.

Yagize ati “70% by’uyu mushinga bizajya mu bikorwa remezo by’amashuri nko kongera umubare w’ibyumba byo kwigiramo, kubaha ibikoresho no kugabanya umubare w’abana mu byumba by’amashuri.”

Ndagijimana yavuze ko ibi bizafasha kugera ku ireme ry’uburezi, kuko abarimu bazaba bashobora gukurikirana neza imyigire y’umunyeshuri umunsi ku munsi.

Guverinoma igiye gukoresha miliyari 12 Frw mu kubaka ibyumba by’amashuri

Related Articles

Leave a Reply

Your email address will not be published. Required fields are marked *

Close