AhabanzaAmakuruRwanda

Abanyarwanda batangiye kwishyuzwa ibyangombwa byo gukorera muri RDC

Abanyarwanda bakorera muri Repubulika iharanira Demokarasi ya Congo cyane cyane mu mujyi wa Goma, basabwe kwishyura Visa kugirango bakomeze akazi kabo nk’uko bisanzwe, nyuma y’icyemezo cyafashwe n’ibiro bishinzwe abinjira n’abasohoka muri icyo gihugu, Direction Générale des Migrations (DGM).

Abakora nk’ubucuruzi buciriritse, abafundi n’abayede cyangwa abacuruzi bakomeye, ntibemerewe kunyura ku mupaka munini cyangwa umuto uhuza u Rwanda na RDC ku buntu, bagomba kwishyura icyangombwa kibemera gukorera muri RDC (visa de séjour’) ku $20 ku mwaka, ni ukuvuga asaga ibihumbi 18 Frw.

Ni icyemezo gifashwe nyuma y’iminsi mike ingendo z’abaturage hagati y’ibihugu byombi zigabanyutse kubera icyorezo cya Ebola cyagaragaye i Goma, ariko nk’Abanyarwanda bafiteyo akazi gahoraho bakomeje kwambuka.

Ubusanzwe bagendaga muri gahunda y’urujya n’uruza hagati y’ibihugu byombi hakoreshejwe ’jetons’. Abambuka umupaka wa RDC ku mpamvu zisanzwe bo bakomeje kwambuka.

Abacuruzi cyangwa abakozi baturuka mu bindi bihugu baba mu Rwanda bagakorera muri RDC, bo barishyuzwa $300 yari asanzweho, mu gihe hari n’abatayatangaga kubera imikorere yari isanzweho.

Hari Abanyarwanda benshi bakorera i Goma akazi gatandukanye batabashije kwambuka kuri uyu wa Kane tariki 15 Kanama 2019, ubwo ibi byemezo byatangiraga gushyirwa mu bikorwa.

Dufitumukiza Elisaphan ukorera ubucuruzi i Goma, avuga ko we yabashije kwambuka nyuma yo kwishyura amadolari 20.

Ati “Njyewe ubu nta kibazo nambutse kuko namaze kwishyura amadolari 20$ nk’uko ibiro by’abinjira n’abasohoka muri Congo babisabye, bakaba bampaye Visa de séjour izamara umwaka nkora akazi kanjye ku mudendezo.”

Ibi bije nyuma y’uko u Rwanda rwafashe icyemezo nk’iki ku baturage ba RDC baba mu Rwanda no ku bakunda kujya kenshi mu mujyi wa Gisenyi cyangwa abanye-Congo biga muri za kaminuza zo mu karere ka Rubavu.

Ku ruhande rwa RDC, abayobozi ba DGM babwiye Radio Okapi muri iki gitondo ko visa yo kwiga yatswe abanyeshuri ba Congo bayizi, bakaba bagiye kuganiriza Abanyarwanda biga muri Congo mbere y’uko na bo batangira kuyibishyuza.

Abaturage bo mu Mujyi wa Gisenyi bakorera imirimo myinshi muri RDC, cyane mu mujyi wa Goma

Related Articles

Leave a Reply

Your email address will not be published. Required fields are marked *

Close